قوانين مرور مصر 2008

قوانين مرور مصر لسنة 2008 !!!!!! انما ايه

1-لو عربيتك كبيرة او قديمة استخدم المبدا القانونى "اللى خايف على عربيته يوسع"
2-ابعد عن سكة العربيات المخرشمة بيسوقوا بنظرية ضربوا الاعور على عينه
3-الاشارات تكشف نواياك للاعداء.. اياك ان تستخدمها
4-لاتترك مسافة للامان بينك و بين العربية اللى قدامك لان دة له مخاطر كتير
ا-عربية تانية هتملى الفراغ فى ثوانى و برضه مايبقاش فيه مسافة بينك و بين اللى قدامك و يبقى كل اللى كسبته انك اتاخرت لورا شوية
ب-كل المشاة هيغمضوا عينيهم و يعدوا من الحتة دى
ج-اللى وراك هيقعد يزمر"لو كان مؤدب" او تسمع شوية اسامى حيوانات "لو كان سواق تاكسى مؤدب" او هيخبطك من ورا لو كان سواق ميكروباس"دول مفيش حد فيهم مؤدب"

5-الاشارات مش معمولة علشان تنظم المرور معمولة بس علشان شكل البلد يبقى متحضر فاعتمد على العساكر مع تحملك كامل المسئولية لو واحد منهم شاورلك تعدى و بلدياته الناحية التانية فتح السكة للورى

6-لو مش واقف فى الصف الاول فى الاشارة اعمل حسابك تكلكس بشكل هيستيرى اول الاشارة ما تفتح لان الناس اللى قدام بيبقوا واقفين فى الاشارة من زمان و جايز جدا يكونوا ناموا

7-الناس اللى ماشية بالراحة دول مرضى نفسيين و يستاهلوا اللى يجرالهم

8-من حقوقك الدستورية ان تركن امام باب المحل اللى هتشترى منه فلو حد سبقك من حقك تقفل عليه و تركن صف تانى و تالت كمان و مش مهم لو الشارع اتقفل ايه يعنى لما الناس تتعطل شوية هما وراهم الديوان

9-احترس من نوعين من السائقين بيسوقوا كانهم مش ممكن يموتوا
ا-سائقى الموتسيكلات و خصوصا موتوسيكلات الhome delivery
ب-سواقين الميكروباس

10-نختم بقاعدة مهمة جدا و هى الbooz base
يعنى اللى يدخل ببوز عربيته الاول للتقاطع هو صاحب اولوية المرور فاحرص على ان تكون صاحب اول بوز .. مع مراعاة عدم تطبيق القاعدة دى مع اى لورى او اوتوبيس حرصا على.. بوزك

لا طبعا امال حكتب الموضوع ده ازاى !!!!!!!! بس فعلا معنديش عربية